Mel.: Jens vejmand
Te fest vi no æ samlet for det at do wos bøj. Do søj at vi sku' hyg' wos, omkring lidt fjedt å brøøj. Men tænk en læwde meje å uen æ sofa heer, hva mæ den lille lue, har do da tænt å det?
Ja, det er ren forfærd'le, å kom te så'n en fest. I bil, mæ bus, å cykel,ja, moske noue te hest. Hva tro'e do it vi døje' bar' mæ å kom he'te? I regn å blæjst å uvæe, har do da tænt å det?
Hva tro'e do it det koste, mæ bows å opsat håe. Ja spøj' do ba' æ knejte, de køjt et slips i gåe. Å så æ piches krølle,som de fik klippet te, å så mæ bus fra [by], har do da tænt å det?
Hva tro'e do it vi tøser, har køjt a' kræmm og fjedt. Å smue å æ kinne' ja, det æ it så lidt. Vi sku' ha' mode-hoser, mæ striife foran te. De koste otte krone' har do da tænt å det?
Ja, tænk no bar æ mænne' de's tøj er blewen venn. De flestes kju'l var fette, de blev te rensen senn. Hvis vi var pensjonister, å åll' de peng' gik te. Så måt' vi lew af vandgrøe. Har do da tænt å det?
Å tænk så åll' de gaue, som vi har gåen å køjt. Ja, hvis vi tent et ette' så blew vi reen forknyt. Hva fæ' vi for en dale'? kun grumme lidt - do ve' Så vi har gien en femme'. Har do da tænt å det?
Nå, skit no æ vi kommen, å komme da igæn. For vi har it fortrøt det,at vi tow mæ he'hen. Nej - vi er vældi' glaj for, at vi æ kommen mæ. Så ålt hva vi har døjet. La' væ'e å tænk å det.
Ja, vi æ vældi glaj for, at vi måt kom i daw. Å ønsk dæ sån teløk mæ, æ fødselsdaw i daw. Å vi æ også glaj for, at vi måt' kom hee no. Å bare spis å drikk te. For do betall æt jo..
No vil vi al'så slutt mæ, å tej vo glas i hånn. Vi rejse wos å skåle,i øl å vin å vand. Å ve' I hva vi ønske, vi ønske å vi tro'e. At do må lew i manne, i manne, manne åe
